网页搜索：
车路士 -0/0.5 阿仙奴 推介：阿仙奴
大家应该仲记得，格兰特取代摩连奴出任车路士领队之后嘅首场比赛，就係喺奥脱福对住强敌曼联，结果车仔0比2落败。如果话嗰阵时格兰特仲未熟悉球队嘅话，咁之后呢？车路士做客又输过畀阿仙奴，主场俾利物浦逼平……换句话讲，格兰特任内对住其他三强从未赢过波。唔止咁，联赛杯决赛输畀热刺、足总杯仲畀队班士利爆冷，越係关键时候，越睇唔出呢位以色列人冇足够嘅气魄震得住个球场。
喺用兵方面，我同样睇唔出格兰特有咩成型嘅架构，比如话之前讲过嘅祖高尔嘅摆放问题，比如话最近暴露出嚟嘅安历卡同杜奥巴嘅兼容问题。眼睇住佢哋两个唔可以打双中锋，格兰特又曾经试过将安历卡放喺左路，效果唔好。最后搞到要轮换，两位射手换吓换吓连状态都冇晒添。如果唔係车仔喺欧联一直抽到好签，我都唔知格兰特仲可唔可以挨到依家嘞。另一方面，车仔周中同热刺恶战一场，体能肯定输蚀。云加班后生仔到咗重新振作嘅时候，呢场波应该唔会输。
(本文来源：网易体育专稿 )
